అమరావతి: మావోయిస్టు పార్టీ (సీపీఐ-మావోయిస్టు)తో అనుబంధం ఉందని పేర్కొంటూ ఎనిమిది సంస్థలపై అమలులో ఉన్న నిషేధాన్ని ఆంధ్రప్రదేశ్ ప్రభుత్వం మరో ఏడాది పాటు పొడిగించింది.

1992 ఆంధ్రప్రదేశ్ పబ్లిక్ సెక్యూరిటీ చట్టం కింద ఈ సంస్థలను 2026 ఆగస్టు 17 నుంచి మరో ఏడాది పాటు చట్టవిరుద్ధ సంస్థలుగా ప్రకటిస్తూ రాష్ట్ర ప్రభుత్వం శుక్రవారం వేర్వేరు జీవోలను జారీ చేసింది. ప్రభుత్వం విడుదల చేసిన గెజిట్ నోటిఫికేషన్ల ప్రకారం, ఈ సంస్థలు ఇప్పటికీ చట్టవిరుద్ధ కార్యకలాపాలను కొనసాగిస్తున్నాయని, వాటి కార్యకలాపాలు ప్రజా శాంతి, భద్రత, ప్రశాంతతకు ముప్పుగా మారే అవకాశం ఉందని ప్రభుత్వం అభిప్రాయపడింది.

నిషేధం కొనసాగనున్న సంస్థలు ఇవే

రాష్ట్ర ప్రభుత్వం నిషేధాన్ని పొడిగించిన సంస్థలు:

• సీపీఐ (మావోయిస్టు)

• రివల్యూషనరీ డెమోక్రటిక్ ఫ్రంట్ (RDF) – మావోయిస్టుల అనుబంధ సంస్థగా పేర్కొంది.

• ఆల్ ఇండియా రివల్యూషనరీ స్టూడెంట్స్ ఫెడరేషన్ (AIRSF)

• రైతు కూలీ సంఘం (RCS) / గ్రామీణ పేదల సంఘం (GPS)

• రాడికల్ స్టూడెంట్స్ యూనియన్ (RSU)

• రాడికల్ యూత్ లీగ్ (RYL)

• సింగరేణి కార్మిక సమాఖ్య (SIKASA)

• విప్లవ కార్మిక సమాఖ్య (VIKASA)

ప్రభుత్వం చెప్పిన కారణాలివే

ప్రతి జీవోలో ప్రభుత్వం ఒకే విధమైన కారణాలను పేర్కొంది. ఈ సంస్థలు గతంలో చట్టవిరుద్ధ సంస్థలుగా ప్రకటించబడినప్పటి నుంచి ప్రతి ఏడాది నిషేధాన్ని పొడిగిస్తూ వస్తున్నట్లు తెలిపింది. తాజా సమీక్షలో కూడా ఆయా సంస్థలు చట్టవిరుద్ధ కార్యకలాపాలను కొనసాగిస్తున్నాయని, వాటి కార్యకలాపాలను అరికట్టకపోతే రాష్ట్రంలో ప్రజా శాంతి, శాంతిభద్రతలు, ప్రశాంతతకు తీవ్ర ముప్పు ఏర్పడే అవకాశం ఉందని ప్రభుత్వం పేర్కొంది. అందువల్లే మరో ఏడాది పాటు నిషేధాన్ని పొడిగిస్తున్నట్లు స్పష్టం చేసింది.

2005 నుంచి ప్రతి ఏడాది పొడిగింపు

ఈ సంస్థలపై తొలిసారిగా 2005లో ఆంధ్రప్రదేశ్ పబ్లిక్ సెక్యూరిటీ చట్టం కింద నిషేధం విధించారు. అనంతరం అడ్వైజరీ బోర్డు అభిప్రాయంతో ఆ నిషేధాన్ని ప్రభుత్వం ప్రతి ఏడాది పునరుద్ధరిస్తూ వస్తోంది. తాజా ఉత్తర్వులతో 2025లో అమలులోకి వచ్చిన నిషేధం గడువు ముగియనున్న నేపథ్యంలో, అది 2026 ఆగస్టు 17 నుంచి మరో ఏడాది పాటు కొనసాగనుంది.