అమరావతి: ఎన్నికల సమయంలో ఇచ్చిన హామీ మేరకు వెనుకబడిన తరగతుల (బీసీ) రక్షణ చట్టాన్ని తీసుకొచ్చేందుకు ఆంధ్రప్రదేశ్ కూటమి ప్రభుత్వం కీలక అడుగు వేసింది. 

ఈ చట్టానికి సంబంధించిన ముసాయిదా బిల్లుకు ఇప్పటికే న్యాయశాఖ ఆమోదం తెలిపింది. రానున్న అసెంబ్లీ సమావేశాల్లో బిల్లును ప్రవేశపెట్టి ఆమోదం పొందిన తర్వాత కేంద్ర ప్రభుత్వానికి పంపాలని ప్రభుత్వం నిర్ణయించింది. 

అలాగే రాజ్యాంగ నిబంధనల మేరకు జాతీయ వెనుకబడిన తరగతుల కమిషన్ (NCBC) అభిప్రాయాన్ని కూడా కోరనుంది.

న్యాయశాఖ అభిప్రాయం ప్రకారం, ఈ బిల్లు రాజ్యాంగం, శాసన నిర్మాణ సూత్రాలకు అనుగుణంగా ఉంది. నేర చట్టం, నేర విచారణ ప్రక్రియ, ఆర్థిక-సామాజిక ప్రణాళిక వంటి ఉమ్మడి జాబితా అంశాల పరిధిలోకి ఈ చట్టం వస్తుందని, దీనిపై చట్టం చేసే అధికారం రాష్ట్ర శాసనసభకు ఉందని స్పష్టం చేసింది. 

అయితే బీసీలపై ప్రభావం చూపే విధానపరమైన నిర్ణయాల విషయంలో జాతీయ వెనుకబడిన తరగతుల కమిషన్‌ను సంప్రదించాలని సూచించింది.

ప్రస్తుతం మంత్రివర్గ ఉపసంఘం ముసాయిదా బిల్లును పరిశీలిస్తోంది. బీసీ కార్పొరేషన్ ఛైర్మన్లు, బీసీ సంఘాలు, మంత్రులు, ఎమ్మెల్యేలు, ఎంపీల అభిప్రాయాలను సేకరించి అవసరమైన మార్పులు చేసిన అనంతరం బిల్లును అసెంబ్లీలో ప్రవేశపెట్టనున్నారు.

ప్రతిపాదిత బీసీ రక్షణ చట్టం రాష్ట్రంలోని 138 వెనుకబడిన కులాల ఆత్మగౌరవం, జీవనోపాధి, ఆస్తులకు చట్టబద్ధ రక్షణ కల్పించడమే లక్ష్యంగా రూపొందిస్తున్నారు. 

బీసీలను కులం పేరుతో దూషించడం, వారి సంప్రదాయ వృత్తులను అవమానిస్తూ వేధించడం, సామాజిక, ఆర్థిక లేదా సాంస్కృతిక బహిష్కరణకు గురిచేయడం వంటి చర్యలను తీవ్రమైన నేరాలుగా పరిగణించనున్నారు. అలాగే బీసీల భూములు, ఆస్తులను అక్రమంగా ఆక్రమించడం లేదా ధ్వంసం చేయడంపై కూడా కఠిన శిక్షలు విధించే నిబంధనలు బిల్లులో ఉన్నాయి.

చట్టం అమలులో భాగంగా ప్రతి జిల్లాలో ప్రత్యేక కోర్టులను ఏర్పాటు చేసి బీసీలపై అఘాయిత్యాల కేసులను వేగంగా విచారించనున్నారు. చార్జ్‌షీట్ దాఖలైన రెండు నెలల్లోపు విచారణ పూర్తి చేయాలని లక్ష్యంగా పెట్టుకున్నారు. తీవ్రమైన కులవివక్ష, దాడుల కేసుల్లో నిందితులకు ముందస్తు బెయిల్‌ లభించకుండా ప్రత్యేక నిబంధనలు తీసుకురానున్నారు.

ఈ చట్టం అమల్లోకి వస్తే, షెడ్యూల్డ్ కులాలు, షెడ్యూల్డ్ తెగలపై అమలులో ఉన్న ఎస్సీ, ఎస్టీ అత్యాచార నిరోధక చట్టం తరహాలోనే బీసీలకు కూడా ప్రత్యేక చట్టపరమైన రక్షణ కల్పించే రాష్ట్రాల్లో ఆంధ్రప్రదేశ్ ఒకటిగా నిలిచే అవకాశం ఉంది.