శివ కుమార్ కాసారం, శ్వేతా లక్ష్మణ్ జంటగా నిశాంత్ దోటి దర్శకత్వంలో తెరకెక్కిన చిత్రం 'సహా: లైఫ్ ఆఫ్ సంజు'. ఈ సినిమా సెప్టెంబర్ 4న ప్రేక్షకుల ముందుకు రానుంది. ఈ నేపథ్యంలో హైదరాబాద్‌లో నిర్వహించిన ట్రైలర్ విడుదల వేడుకలో చిత్ర బృందం పాల్గొని మాట్లాడింది.

ఈ కార్యక్రమంలో హీరోయిన్ శ్వేతా లక్ష్మణ్ చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. తమ చిత్రం ప్రేక్షకులందరికీ ఖచ్చితంగా నచ్చుతుందని ఆమె ధీమా వ్యక్తం చేశారు. ప్రేమలోని బాధ, త్యాగం, జీవితాన్ని మార్చే నిర్ణయాలను ఈ సినిమాలో చాలా ఎమోషనల్‌గా చూపించామని చెప్పారు.

ప్రేక్షకులకు విజ్ఞప్తి చేయడం లేదని, ఛాలెంజ్ చేస్తున్నానని శ్వేత పేర్కొన్నారు. ఒకవేళ ఈ సినిమా చూసి ఎవరైనా నిరాశపడితే, తాను అమీర్‌పేట్ సెంటర్‌లో నిలబడి గుండు కొట్టించుకుంటానని సవాల్ విసిరారు. మంచి కంటెంట్‌తో వస్తున్నామని, ఖచ్చితంగా హిట్ కొడతామని స్పష్టం చేశారు.

మరోవైపు హీరో శివ కుమార్ కాసారం మాట్లాడుతూ, ఈ చిత్రం అందరి అంచనాలను అందుకుంటుందని చెప్పారు. ఒకవేళ అంచనాలు అందుకోలేకపోతే తనకు ఫోన్ చేసి తిట్టవచ్చంటూ తన ఫోన్ నంబర్‌ను బహిరంగంగా వెల్లడించారు. పెద్ద సినిమాల పోటీ నడుమ విడుదలై విజయం సాధించినప్పుడే పరిశ్రమ గుర్తస్తుందని ఆయన వ్యాఖ్యానించారు.