హైదరాబాద్‌: ప్రముఖ తెలుగు నటుడు జి.వి. నారాయణరావు (73) కన్నుమూశారు. ఆయన మృతిచెందిన విషయాన్ని నటి కరాటే కల్యాణి సోషల్‌ మీడియా వేదికగా వెల్లడించారు. ఆయన మృతితో తెలుగు చిత్ర పరిశ్రమలో విషాదం నెలకొంది. నారాయణరావు మృతిపై మూవీ ఆర్టిస్ట్స్‌ అసోసియేషన్‌ (మా) సంతాపం తెలిపింది.

జి.వి. నారాయణరావు 100కు పైగా చిత్రాల్లో నటించారు. 1976లో కె. బాలచందర్‌ దర్శకత్వంలో తెరకెక్కిన ‘అంతులేని కథ’ చిత్రంతో నటుడిగా వెండితెరకు పరిచయమయ్యారు. తొలి చిత్రంతోనే ఉత్తమ సహాయ నటుడిగా నంది అవార్డును అందుకున్నారు. అనంతరం వైవిధ్యమైన పాత్రలు పోషిస్తూ తనకంటూ ప్రత్యేక గుర్తింపు తెచ్చుకున్నారు.

‘అంతులేని కథ’, ‘ముత్యాల పల్లకి’, ‘అంగడి బొమ్మ’, ‘చిలకమ్మ చెప్పింది’, ‘గ్యాంగ్‌ లీడర్‌’, ‘హిట్లర్‌’ తదితర చిత్రాల్లో ఆయన నటించారు. సినిమాలతో పాటు పలు టీవీ సీరియళ్లలోనూ కనిపించారు. నటుడిగానే కాకుండా నిర్మాతగానూ ఆయన సినీ పరిశ్రమకు సేవలందించారు. ‘దేవాంతకుడు’, ‘ఇంటికో రుద్రమ్మ’, ‘యముడికి మొగుడు’, ‘పెళ్లి నీకు శుభం నాకు’ వంటి చిత్రాలను నిర్మించారు.

నాటక రంగం నుంచి వెండితెరకు

కృష్ణాజిల్లా కురుమద్దాలి గ్రామంలో జన్మించిన నారాయణరావు బాల్యం, విద్యాభ్యాసం గుంతకల్లులో సాగింది. కళలపై చిన్ననాటి నుంచే ఆసక్తి పెంచుకున్న ఆయన గిడుగు విశాలాక్షి వద్ద భరతనాట్యం, నటరాజ రామకృష్ణ వద్ద కూచిపూడి నృత్యం, ఎ.ఆర్. కృష్ణ వద్ద నటన అభ్యసించారు.

విద్యార్థి దశలోనే ‘మహమ్మద్‌ బిన్‌ తుగ్లక్‌’, ‘ప్రతాపరుద్రీయం’, ‘మంచుతెర’ తదితర నాటకాల్లో నటించారు. రంగస్థలంపై ఆయనకు దివంగత నటులు కోట శ్రీనివాసరావు, నూతన ప్రసాద్, దేవదాస్‌ కనకాల తదితరులతో స్నేహం ఏర్పడింది. అనంతరం మద్రాస్‌ ఫిలిం ఇన్‌స్టిట్యూట్‌లో శిక్షణ తీసుకుని సినిమాల్లోకి ప్రవేశించారు.

రజనీకాంత్‌, చిరంజీవితో స్నేహం

జి.వి. నారాయణరావుకు ప్రముఖ నటులు రజనీకాంత్‌, చిరంజీవితో సన్నిహిత స్నేహం ఉండేది. మద్రాస్‌ ఫిలిం ఇన్‌స్టిట్యూట్‌లో శిక్షణ పొందిన సమయంలో ఏర్పడిన పరిచయాలు తర్వాతి కాలంలోనూ కొనసాగాయి.

సారథి స్టూడియోస్‌తో కుటుంబ అనుబంధం

జి.వి. నారాయణరావు కుటుంబానికి సారథి స్టూడియోస్‌తో దశాబ్దాల అనుబంధం ఉంది. ఆయన తండ్రి, నవయుగ ఫిలిమ్స్‌ భాగస్వామి అయిన జి. ప్రసాదరావు, 1964లో సారథి స్టూడియోస్‌ మేనేజింగ్‌ డైరెక్టర్‌గా బాధ్యతలు చేపట్టారు. నవయుగ సంస్థ సారథి స్టూడియోస్‌లో 45 శాతం వాటాను కొనుగోలు చేసిన తర్వాత నారాయణరావు కుటుంబం స్టూడియో నిర్వహణ బాధ్యతలను చూసుకుంది.

సారథి స్టూడియోస్‌ అత్యున్నత దశలో ఉన్న సమయంలో తమ కుటుంబమే దాని నిర్వహణను చూసుకుందని నారాయణరావు గతంలో ఒక ఇంటర్వ్యూలో వెల్లడించారు. అయితే కుటుంబ వివాదాలు, వ్యాపార పరిస్థితుల్లో వచ్చిన మార్పుల నేపథ్యంలో 1980లలో స్టూడియోను విక్రయించాల్సి వచ్చిందని ఆయన తెలిపారు.

జి.వి. నారాయణరావుకు ఒక కుమారుడు, ఒక కుమార్తె ఉన్నారు. వారిద్దరూ ప్రస్తుతం విదేశాల్లో నివసిస్తున్నారు. నటుడిగా, నిర్మాతగా, రంగస్థల కళాకారుడిగా తెలుగు కళారంగానికి సేవలందించిన జి.వి. నారాయణరావు మృతి సినీ పరిశ్రమకు తీరని లోటుగా పలువురు పేర్కొంటున్నారు.