న్యూఢిల్లీ: జాతీయ గీతం ‘జనగణమన’తో సమానంగా జాతీయ గేయం ‘వందేమాతరం’కు చట్టబద్ధ రక్షణ కల్పించే Prevention of Insults to National Honour (Amendment) Bill, 2026కు రాష్ట్రపతి ద్రౌపదీ ముర్ము ఆమోదం తెలిపారు. దీంతో ఉద్దేశపూర్వకంగా వందేమాతరం గానాన్ని అడ్డుకోవడం లేదా దాన్ని ఆలపిస్తున్న సభకు అంతరాయం కలిగించడం శిక్షార్హమైన నేరంగా మారింది. ఈ బిల్లును పార్లమెంట్‌లోని రెండు సభలు ఆమోదించిన తర్వాత రాష్ట్రపతి ఆమోదం లభించింది.

ఏం మారింది?

1971 నాటి Prevention of Insults to National Honour Actలో జాతీయ జెండాను, రాజ్యాంగాన్ని, జాతీయ గీతాన్ని అవమానించడాన్ని  నిరోధించడానికి నిబంధనలు ఉన్నాయి. 2026 సవరణతో అదే చట్టపరమైన రక్షణ పరిధిలోకి జాతీయ గేయం వందేమాతరంను కూడా తీసుకొచ్చారు. ఉద్దేశపూర్వకంగా జాతీయ గీతం లేదా జాతీయ గేయం పాడటాన్ని అడ్డుకోవడం, లేదా వాటిని ఆలపిస్తున్న సభకు అంతరాయం కలిగించడం నేరంగా పరిగణిస్తారు.

మొదటి నేరానికి గరిష్ఠంగా మూడేళ్ల జైలు, జరిమానా లేదా రెండూ విధించే అవకాశం ఉంటుంది. రెండోసారి, ఆ తర్వాత ప్రతి నేరానికి కనీసం ఏడాది జైలు శిక్షకు సంబంధించిన నిబంధన కూడా చట్టంలో ఉంది.

అయితే, ఈ చట్టం వందేమాతరం పాడటాన్ని ప్రతి వ్యక్తికి తప్పనిసరి చేస్తుందనే అర్థం కాదు. చట్టంలోని కొత్త నిబంధన ప్రధానంగా గానాన్ని ఉద్దేశపూర్వకంగా అడ్డుకోవడం లేదా ఆ గానం జరుగుతున్న సభకు అంతరాయం కలిగించడాన్ని శిక్షార్హంగా చేస్తుంది.