నల్గొండ: కొండమల్లేపల్లిలో నాగార్జున గ్రామర్‌ కాన్సెప్ట్‌ స్కూల్‌ ప్రిన్సిపల్‌ కల్లు రూపారెడ్డి (48) హత్య కేసులో సంచలన విషయాలు వెలుగులోకి వచ్చాయి.

ఆమెను హత్య చేసింది అదే పాఠశాలలో పదో తరగతి చదువుతున్న ఇద్దరు 16 ఏళ్ల విద్యార్థులేనని పోలీసులు తేల్చారు. వ్యసనాలకు అలవాటు పడిన విద్యార్థులను తల్లిదండ్రుల సమక్షంలో ప్రిన్సిపల్‌ మందలించడంతో ఆమెపై కక్ష పెంచుకున్న వారు.. డబ్బు కోసం హత్యకు పథకం వేసినట్లు పోలీసులు వెల్లడించారు. ఐదు ప్రత్యేక బృందాలతో దర్యాప్తు చేపట్టిన పోలీసులు ఎనిమిది రోజుల్లో కేసును ఛేదించారు.

నల్గొండ జిల్లా పోలీసు కార్యాలయంలో బుధవారం నిర్వహించిన విలేకరుల సమావేశంలో ఎస్పీ శరత్‌చంద్ర పవార్‌ కేసు వివరాలను వెల్లడించారు.

మందలించడంతో కక్ష

కొండమల్లేపల్లి మండలం ఫూల్సింగ్‌ తండా, పిల్యాతండాలకు చెందిన ఇద్దరు విద్యార్థులు స్నేహితులు. ఇద్దరూ నాగార్జున గ్రామర్‌ కాన్సెప్ట్‌ స్కూల్‌లో పదో తరగతి చదువుతూ పాఠశాల వసతిగృహంలో ఉంటున్నారు. వారు సిగరెట్లు, మద్యం వంటి వ్యసనాలకు అలవాటు పడటంతోపాటు జల్సాలకు పాల్పడుతున్న విషయాన్ని ప్రిన్సిపల్‌ రూపారెడ్డి గుర్తించారు.

విద్యార్థుల ప్రవర్తనపై ఆందోళన చెందిన ఆమె వారి తల్లిదండ్రులను పాఠశాలకు పిలిపించారు. వారి సమక్షంలో ఇద్దరినీ గట్టిగా మందలించారు. దీంతో ప్రిన్సిపల్‌పై విద్యార్థులు కక్ష పెంచుకున్నారు. ఇదే సమయంలో రూపారెడ్డి ఇంట్లో పెద్ద మొత్తంలో నగదు ఉంటుందని వారికి తెలిసింది. దీంతో సుమారు వారం రోజుల ముందే ఆమెను హత్య చేసి డబ్బు దోచుకోవాలని పథకం రూపొందించుకున్నారు.

మూడు రోజుల సెలవులను గమనించి..

రూపారెడ్డి భర్త రాజేందర్‌రెడ్డి రియల్‌ ఎస్టేట్‌ వ్యాపారం చేస్తున్నారు. కొండమల్లేపల్లితోపాటు హైదరాబాద్‌లోనూ వారికి ఇళ్లు ఉన్నాయి. వారి కుమారుడు అభినవ్‌రెడ్డి హైదరాబాద్‌లో ఇంజినీరింగ్‌ చదువుతున్నాడు. దీంతో రూపారెడ్డి దంపతులు తరచూ హైదరాబాద్‌కు వెళ్తుంటారు.

ఈ నెల 8 నుంచి వరుసగా మూడు రోజులు సెలవులు రావడంతో వారు హైదరాబాద్‌ వెళ్లారు. రాజేందర్‌రెడ్డికి అక్కడ పని ఉండటంతో ఆయన హైదరాబాద్‌లోనే ఉండిపోయారు. ఈ నెల 11న ఉదయం కొండమల్లేపల్లికి వచ్చిన రూపారెడ్డి పాఠశాలకు వెళ్లి సాయంత్రం ఇంటికి చేరుకున్నారు. ఆమె ఇంట్లో ఒంటరిగా ఉన్న విషయాన్ని విద్యార్థులు గుర్తించి తమ పథకాన్ని అమలు చేశారు.

ముందస్తు ఏర్పాట్లతో హత్య

ఫూల్సింగ్‌ తండాకు చెందిన విద్యార్థి తన ఇంటికి వెళ్లి ముందే కొనుగోలు చేసి ఉంచుకున్న హుడీ, టీషర్ట్‌, ప్యాంట్‌, మాస్కులను తీసుకుని 11వ తేదీ సాయంత్రం 4 గంటల ప్రాంతంలో బయటకు వచ్చాడు. అనంతరం పిల్యాతండాకు చెందిన స్నేహితుడితో కలిసి కొండమల్లేపల్లిలో కత్తి, చేతి గ్లౌజులు కొనుగోలు చేశారు.

రూపారెడ్డి ఇంటి సమీపంలోని నీటి ట్యాంకు వద్ద ఒక విద్యార్థి కాపలాగా ఉండగా.. మరో విద్యార్థి ఇంటి వెనుక భాగం నుంచి లోపలికి ప్రవేశించాడు. వంటగది తెరిచి ఉండటంతో అక్కడి నుంచి ఇంట్లోకి వెళ్లాడు. తనను రూపారెడ్డి గుర్తించడంతో వెంట తెచ్చుకున్న కత్తితో ఆమెపై 27 సార్లు దాడి చేసి హత్య చేసినట్లు పోలీసులు తెలిపారు.

అనంతరం బెడ్‌రూంలో ఉన్న రూ.2.50 లక్షల నగదును తీసుకుని గోడ దూకి బయటకు వచ్చాడు. ఇద్దరూ కలిసి రూపారెడ్డి సెల్‌ఫోన్‌ను స్విచాఫ్‌ చేసి ఇంటికి సమీపంలోని ఓ బండరాయి కింద పెట్టారు. కొంత దూరం వెళ్లిన తర్వాత హత్య సమయంలో ధరించిన హుడీని డ్రైనేజీలో పడేశారు.

మరుసటి రోజు రూపారెడ్డి హత్య విషయం వెలుగులోకి వచ్చింది.

‘బాబు’ అనే చివరి మాటతో కీలక ఆధారం

హత్యకు ముందు రూపారెడ్డి తన చిన్నమ్మతో ఫోన్‌లో మాట్లాడారు. ఆమె చివరిగా పలికిన మాట ‘బాబు’. అనంతరం ఫోన్‌ స్విచాఫ్‌ అయింది. దీంతో ఆమె ‘బాబు’ అని ఎవరిని ఉద్దేశించి మాట్లాడారన్న కోణంలో పోలీసులు దర్యాప్తు చేశారు.

ఆ దర్యాప్తులో అదే పాఠశాలలో చదువుతున్న ఓ విద్యార్థి పేరుపై అనుమానం ఏర్పడింది. మరోవైపు నిందితులు సామాజిక మాధ్యమాల్లో చేసిన శోధనలు కూడా పోలీసులకు కీలక ఆధారాలుగా మారాయి. తక్కువ సమయంలో ఎక్కువ డబ్బు ఎలా సంపాదించాలి, హత్య ఎలా చేయాలి, హత్య తర్వాత పోలీసులకు చిక్కకుండా ఎలా తప్పించుకోవాలన్న అంశాలపై వారు శోధించినట్లు దర్యాప్తులో గుర్తించారు.

హత్యకు ముందు గ్లౌజులు కొనుగోలు చేసిన దుకాణ యజమానిని కూడా పోలీసులు విచారించారు.

జల్సాల కోసం డబ్బు

విద్యార్థులు సిగరెట్లు, మద్యం వంటి వ్యసనాలకు అలవాటు పడటంతోపాటు ఖరీదైన ద్విచక్ర వాహనాలు కొనుగోలు చేసి జల్సాగా జీవించాలనే ఆలోచనలో ఉన్నట్లు విచారణలో వెల్లడైంది. వారు తొమ్మిదో తరగతిలో ఉన్నప్పుడే గోవాకు వెళ్లి వచ్చినట్లు పోలీసులు తెలిపారు.

రూపారెడ్డిని హత్య చేసిన తర్వాత దోచుకున్న రూ.2.50 లక్షల్లో ఒక విద్యార్థి రూ.2.10 లక్షలు, మరొకరు రూ.40 వేలు పంచుకున్నారు. అనంతరం ఇద్దరూ తమ ఇళ్లకు వెళ్లారు. మరుసటి రోజు ఏమీ తెలియనట్లుగా రూపారెడ్డి మృతదేహాన్ని చూసేందుకు కూడా వచ్చారు. వారిలో ఒకరు దోచుకున్న డబ్బుతో ఖరీదైన సెల్‌ఫోన్‌ కొనుగోలు చేసినట్లు పోలీసులు గుర్తించారు.

70 సీసీ కెమెరాల పరిశీలన

కేసు దర్యాప్తు కోసం పోలీసులు ఐదు ప్రత్యేక బృందాలను ఏర్పాటు చేశారు. అన్ని కోణాల్లో దర్యాప్తు చేపట్టిన బృందాలు సుమారు 70 సీసీ కెమెరాల ఫుటేజీని పరిశీలించాయి. దాదాపు 80 మందిని విచారించారు.

బుధవారం ఉదయం 11.30 గంటల ప్రాంతంలో పెండ్లిపాక ఎక్స్‌ రోడ్డు నుంచి కొండమల్లేపల్లి వైపు ద్విచక్ర వాహనంపై వస్తున్న ఇద్దరు విద్యార్థులను పోలీసులు అదుపులోకి తీసుకున్నారు. వారి వద్ద తనిఖీ చేయగా లోదుస్తుల్లో దాచిన రూ.1.54 లక్షల నగదు లభించింది. ఆ నోట్ల కట్టలపై రక్తపు మరకలు ఉండటంతో పోలీసులు అనుమానించి లోతుగా విచారించారు.

విచారణలో ఇద్దరూ రూపారెడ్డిని హత్య చేసి నగదు అపహరించినట్లు అంగీకరించినట్లు పోలీసులు తెలిపారు.

కీలక వస్తువులు స్వాధీనం

నిందితుల నుంచి రూపారెడ్డి ఐఫోన్‌, హత్యకు ఉపయోగించిన కత్తి, చేతి గ్లౌజులు, మాస్కులు, రెండు సెల్‌ఫోన్లను పోలీసులు స్వాధీనం చేసుకున్నారు.

చదువుకోవాల్సిన వయసులో వ్యసనాలు, సోషల్‌ మీడియా ప్రభావం, సులభంగా డబ్బు సంపాదించాలన్న ఆలోచన ఎలా ప్రమాదకర దారులకు తీసుకెళ్లిందో ఈ ఘటన తీవ్రంగా చర్చనీయాంశమైంది. ప్రిన్సిపల్‌ను హత్య చేసే స్థాయికి ఇద్దరు విద్యార్థులు వెళ్లడం కొండమల్లేపల్లిలో తీవ్ర కలకలం రేపింది.