భర్తకు వైవాహిక జీవితానికి సంబంధించిన శారీరక సమస్య ఉన్న విషయాన్ని పెళ్లికి ముందు దాచిపెట్టారని, పెళ్లి చేసిన తర్వాత క్రైస్తవ మతానికి చెందిన వారని తెలిసిందని జోగి రమేష్ కోడలు ఫిర్యాదులో తెలిపారు.

అమరావతి: మాజీ మంత్రి, వైఎస్సార్‌సీపీ సీనియర్ నేత జోగి రమేష్‌, ఆయన కుటుంబ సభ్యులు 10 మందిపై ఇబ్రహీంపట్నం పోలీసులు కేసు నమోదు చేశారు. జోగి రమేష్ పెద్ద కోడలు జోగి మేఘన ఇచ్చిన ఫిర్యాదు మేరకు భార్యపై వేధింపులు, అదనపు కట్నం డిమాండ్, హత్యాయత్నం తదితర ఆరోపణలపై ఎఫ్‌ఐఆర్‌ నమోదు చేశారు.

పెళ్లి తర్వాత వేధింపులు మొదలయ్యాయని ఆరోపణ

2025 మే 28న సూర్యాపేటలో జోగి రాజీవ్‌తో తన వివాహం జరిగిందని, పెళ్లైన నెల రోజుల్లోనే భర్త, అత్తింటి కుటుంబ సభ్యులు మానసికంగా, శారీరకంగా వేధించడం ప్రారంభించారని మేఘన ఫిర్యాదులో పేర్కొన్నారు. పెళ్లి సమయంలో భారీగా కట్నం, బంగారం, వెండి, ఇతర కానుకలు ఇచ్చినప్పటికీ అదనంగా రూ.5 కోట్ల కట్నం, ఫార్చ్యూనర్ కారు, కుటుంబ సభ్యులకు వజ్రాల ఆభరణాలు తీసుకురావాలని ఒత్తిడి చేశారని ఆరోపించారు.

హత్యాయత్నం చేశారని ఆరోపణ

తనను ఇంట్లో బంధించి, పలుమార్లు కొట్టారని, రెండు రోజుల పాటు భోజనం కూడా ఇవ్వలేదని మేఘన ఆరోపించారు. ఇంటి టెర్రస్‌పై నుంచి తోసివేయడానికి, మెడకు చున్నీ బిగించి, ముఖంపై దిండు పెట్టి చంపేందుకు ప్రయత్నించారని ఫిర్యాదులో పేర్కొన్నారు. గోవా పర్యటనలో బోటు నుంచి తోసివేయడానికి, అనంతరం హైదరాబాద్‌ నార్సింగిలోని విల్లాలో కూడా దాడి చేసి హత్యాయత్నం చేశారని ఆరోపించారు.

మోసం చేశారంటూ ఆరోపణ

భర్తకు వైవాహిక జీవితానికి సంబంధించిన శారీరక సమస్య ఉన్న విషయాన్ని పెళ్లికి ముందు దాచిపెట్టారని, ఇది మోసంగా భావిస్తున్నట్లు మేఘన పేర్కొన్నారు. అలాగే తమ కుటుంబం హిందువులమని చెప్పి పెళ్లి చేసిన తర్వాత క్రైస్తవ మతానికి చెందిన వారని తెలిసిందని, హిందూ పూజలు చేయకుండా అడ్డుకున్నారని కూడా ఫిర్యాదులో ఆరోపించారు.

11 మందిపై ఎఫ్‌ఐఆర్‌

మేఘన ఫిర్యాదు మేరకు జోగి రమేష్‌, ఆయన కుమారుడు జోగి రాజీవ్‌, భార్య జోగి శకుంతలతో పాటు మొత్తం 11 మందిని నిందితులుగా చేర్చారు. 

జోగి రాజీవ్ – భర్త

జోగి రమేష్ – మాజీ మంత్రి, మామ

జోగి శకుంతల – అత్త

జోగి రాము – జోగి రమేష్ సోదరుడు

రమా – జోగి రమేష్ సోదరి

పాండు – జోగి రాము కుమారుడు

రాకేశ్ – జోగి రాము కుమారుడు

ప్రియాంక – కుటుంబ సభ్యురాలు

రోహిత్ – కుటుంబ సభ్యుడు

స్వామి – కుటుంబ సభ్యుడు/బంధువు

సాయి – కుటుంబ సభ్యుడు/బంధువు

భారతీయ న్యాయ సంహిత (BNS)లోని గృహహింస, మోసం, ప్రేరేపణ, హత్యాయత్నానికి సంబంధించిన సెక్షన్లతో పాటు కట్న నిషేధ చట్టంలోని సెక్షన్‌ 3, 4 కింద కేసు నమోదు చేశారు.

దర్యాప్తు ప్రారంభం

ఇబ్రహీంపట్నం పోలీసులు మేఘన వాంగ్మూలాన్ని నమోదు చేసి దర్యాప్తు ప్రారంభించారు. కేసులో పేరున్న నిందితులకు త్వరలో నోటీసులు జారీ చేసి విచారణకు పిలిచే అవకాశం ఉంది.