న్యూఢిల్లీ: ప్రధాని నరేంద్ర మోదీ, కాక్రోచ్‌ జనతా పార్టీ (సీజేపీ) సోషల్‌ మీడియా ప్రాచుర్యం దేశవ్యాప్తంగా చర్చనీయాంశంగా మారింది. నీట్‌ పేపర్‌ లీక్‌ వివాదం నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్‌ రాజీనామా చేసిన తర్వాత మోదీ విడుదల చేసిన వీడియో, సీజేపీ విజయోత్సవ రీల్స్‌ భారీ స్థాయిలో వ్యూస్ సాధించినట్లు ఆయా వర్గాలు పేర్కొంటున్నాయి. అయితే ఈ రికార్డులకు సంబంధించి మెటా లేదా గిన్నిస్‌ వరల్డ్‌ రికార్డ్స్‌ నుంచి అధికారిక ధ్రువీకరణ లేదు.

ప్రధాని మోదీ గురువారం అర్ధరాత్రి ఇన్‌స్టాగ్రామ్‌లో సెల్ఫీ వీడియోను విడుదల చేశారు. నీట్‌ లీక్‌ ఘటనపై స్పందిస్తూ, ప్రశ్నాపత్రాల లీకేజీని అరికట్టేందుకు కఠిన చట్టాలు, ఫాస్ట్‌ట్రాక్‌ కోర్టులు ఏర్పాటు చేస్తామని ప్రకటించారు. ఈ వీడియో తొలి 24 గంటల్లో 30.3 కోట్ల నుంచి 34.1 కోట్ల మధ్య వ్యూస్‌ సాధించినట్లు పలు నివేదికలు పేర్కొన్నాయి.

అదే సమయంలో మోదీ ఇన్‌స్టాగ్రామ్‌ ఖాతా 10 కోట్ల ఫాలోవర్ల మైలురాయిని దాటగా, ఒక్కరోజులోనే సుమారు 10 లక్షల మంది కొత్త ఫాలోవర్లు చేరినట్లు సమాచారం.

మరోవైపు ధర్మేంద్ర ప్రధాన్‌ రాజీనామా అనంతరం ఢిల్లీలోని జంతర్‌మంతర్‌ వద్ద సీజేపీ వ్యవస్థాపకుడు అభిజీత్‌ దీప్కే చేసిన విజయ ప్రకటన వీడియో కూడా సోషల్‌ మీడియాలో వైరల్‌గా మారింది. ఆ వీడియో విడుదలైన 10 గంటల్లోనే 12 కోట్ల వ్యూస్‌, దాదాపు కోటి లైక్స్‌ నమోదు చేసినట్లు పార్టీ ప్రకటించింది. తొలి ఐదు గంటల్లోనే 10 కోట్ల వ్యూస్‌ను దాటినట్లు కూడా పేర్కొంది.

సీజేపీ ఇన్‌స్టాగ్రామ్‌ ఖాతాకు ప్రస్తుతం 2.5 కోట్లకుపైగా ఫాలోవర్లు ఉన్నారు. ఇది కాంగ్రెస్‌ (సుమారు 1.33 కోట్లు), బీజేపీ (సుమారు 87 లక్షలు) అధికారిక ఇన్‌స్టాగ్రామ్‌ ఖాతాల కంటే ఎక్కువ అని పార్టీ పేర్కొంది. డిజిటల్‌ వేదికల్లో యువత మద్దతుతోనే ఈ స్థాయికి చేరుకున్నామని, నిరుద్యోగం, పరీక్షల లీకేజీలపై ఉన్న అసంతృప్తి ఈ స్పందనకు కారణమని సీజేపీ నాయకత్వం చెబుతోంది.

పాకిస్థాన్‌లోనూ విద్యార్థులు ఈ ఉద్యమానికి మద్దతుగా స్పందిస్తూ రియాక్షన్‌ వీడియోలు పోస్టు చేసినట్లు సోషల్‌ మీడియాలో విస్తృతంగా ప్రచారం జరిగింది.