వైసిపి హయాంలో ఆయన అధికార పార్టీకి అనుకూలంగా పలు కార్యక్రమాలు నిర్వహించారని, యూనివర్శిటీని పార్టీ కేంద్రంగా మార్చారని ప్రొఫెసర్ ప్రసాదరెడ్డిపై ఆరోపణలు.

విశాఖపట్నం: ఆంధ్ర విశ్వవిద్యాలయం (ఏయూ) మాజీ వైస్‌ ఛాన్సలర్ ప్రొఫెసర్ పి.వి.జి.డి. ప్రసాద్‌రెడ్డిని సస్పెండ్ చేస్తూ రాష్ట్ర ప్రభుత్వం కీలక నిర్ణయం తీసుకుంది.

విజిలెన్స్ అండ్ ఎన్‌ఫోర్స్‌మెంట్ విభాగం, ప్రత్యేక విచారణ కమిటీల నివేదికల ఆధారంగా ఈ నిర్ణయం తీసుకున్నట్లు ఏయూ పాలకవర్గం వెల్లడించింది. విశేషమేమిటంటే, పదవీ విరమణ చేయాల్సిన రోజే (జూలై 31) ఆయనపై సస్పెన్షన్ వేటు పడింది.

విజిలెన్స్ నివేదికల ఆధారంగా చర్య

ప్రసాద్‌రెడ్డి హయాంలో ఆర్థిక అక్రమాలు, అధికార దుర్వినియోగం, విశ్వవిద్యాలయ పరిపాలనలో నిబంధనల ఉల్లంఘన జరిగినట్లు వచ్చిన ఆరోపణలపై ప్రభుత్వం గతంలో విజిలెన్స్ విచారణకు ఆదేశించింది. విచారణలో సేకరించిన వివరాలు, కమిటీల నివేదికలను పరిశీలించిన అనంతరం ఉన్నత విద్యాశాఖ సస్పెన్షన్ నిర్ణయం తీసుకున్నట్లు అధికారులు తెలిపారు. విచారణకు ఆటంకం కలగకుండా ఉండేందుకే ఈ చర్య తీసుకున్నట్లు పేర్కొన్నారు.

ప్రధాన ఆరోపణలు ఇవే..

ప్రసాద్‌రెడ్డిపై నమోదైన ఆరోపణల్లో అత్యంత కీలకమైనవి ఆర్థిక అవకతవకలకు సంబంధించినవే. రాష్ట్రీయ ఉచ్చతర్ శిక్షా అభియాన్ (RUSA) నిధుల్లో సుమారు రూ.20 కోట్ల దుర్వినియోగం జరిగినట్లు, ఇస్రో (ISRO) నుంచి వచ్చిన రూ.25 లక్షల నిధుల వినియోగంలోనూ నిబంధనలు పాటించలేదనే ఆరోపణలు ఉన్నాయి.

అదే సమయంలో యూజీసీ నిబంధనలను, విశ్వవిద్యాలయ చట్టాలను పక్కనబెట్టి కొందరు ఉద్యోగులకు పదవీ విరమణ తర్వాత కూడా పొడిగింపులు ఇవ్వడం, అక్రమ ప్రమోషన్లు కల్పించడం, పరిపాలనా అధికారాలను దుర్వినియోగం చేయడం వంటి ఆరోపణలూ విచారణలో ప్రస్తావనకు వచ్చినట్లు సమాచారం.

క్యాంపస్ రాజకీయీకరణపై తీవ్ర ఆరోపణలు

ప్రసాద్‌రెడ్డి పదవీకాలంలో ఆంధ్ర విశ్వవిద్యాలయాన్ని రాజకీయ కార్యకలాపాలకు వేదికగా మార్చారని ప్రభుత్వం నియమించిన విచారణల్లో ఆరోపణలు నమోదయ్యాయి. ముఖ్యంగా వైఎస్సార్‌సీపీ ప్రభుత్వ హయాంలో విశ్వవిద్యాలయ ప్రాంగణంలో పార్టీ సమావేశాలు నిర్వహించడం, జీవీఎంసీ ఎన్నికల సమయంలో వీసీ కార్యాలయాన్ని ఎన్నికల వ్యూహాలకు వినియోగించడం, విద్యార్థులను రాజకీయ సర్వేలకు ఉపయోగించుకోవడం వంటి అంశాలు విజిలెన్స్ నివేదికల్లో ప్రస్తావించినట్లు తెలుస్తోంది.

అలాగే అప్పటి ముఖ్యమంత్రి వైఎస్ జగన్ మోహన్ రెడ్డి, ఇతర వైఎస్సార్‌సీపీ నేతల కార్యక్రమాలకు విద్యార్థులను తరలించడం, తరగతులను రద్దు చేసి రాజకీయ ర్యాలీల్లో పాల్గొనేలా చేశారనే ఆరోపణలు కూడా విచారణలో భాగమయ్యాయి.

ఎన్నికల కోడ్ ఉల్లంఘన ఆరోపణలు

2023 ఉత్తరాంధ్ర పట్టభద్రుల ఎమ్మెల్సీ ఎన్నికల సమయంలో ఎన్నికల ప్రవర్తనా నియమావళిని ఉల్లంఘించారంటూ ప్రసాద్‌రెడ్డిపై పలు ఉద్యోగ, ఉపాధ్యాయ సంఘాలు రాష్ట్ర ఎన్నికల సంఘానికి ఫిర్యాదు చేశాయి. ఎన్నికల కోడ్ అమల్లో ఉండగానే ప్రైవేట్ విద్యాసంస్థల యాజమాన్యాలతో సమావేశాలు నిర్వహించి అధికార పార్టీ అభ్యర్థికి అనుకూలంగా వ్యవహరించారనే ఆరోపణలు అప్పట్లో తీవ్ర చర్చకు దారితీశాయి.

హైకోర్టు ధిక్కరణ కేసులో జైలు శిక్ష

ప్రసాద్‌రెడ్డి గతంలో అధ్యాపకుల సేవా నిబంధనలకు సంబంధించిన కేసులో ఆంధ్రప్రదేశ్ హైకోర్టు ఆదేశాలను పాటించకపోవడంతో కోర్టు ధిక్కరణ కేసులో ఒక నెల జైలు శిక్ష కూడా ఎదుర్కొన్నారు. ఆ ఘటన కూడా ఆయనపై ప్రభుత్వ చర్యలకు కారణమైన అంశాల్లో ఒకటిగా భావిస్తున్నారు.

ఏసీబీ దర్యాప్తుకు రంగం సిద్ధం

సస్పెన్షన్‌తో పాటు ప్రసాద్‌రెడ్డి హయాంలో జరిగిన ఆర్థిక వ్యవహారాలపై పూర్తి స్థాయి దర్యాప్తు నిర్వహించాలని ప్రభుత్వం నిర్ణయించింది. ఈ కేసులో యాంటీ కరప్షన్ బ్యూరో (ఏసీబీ) ద్వారా సమగ్ర విచారణ చేపట్టనున్నట్లు అధికార వర్గాలు తెలిపాయి. విజిలెన్స్ నివేదికల్లో ప్రస్తావించిన అంశాల ఆధారంగా అవసరమైతే క్రిమినల్ కేసులు కూడా నమోదు చేసే అవకాశాన్ని ప్రభుత్వం పరిశీలిస్తున్నట్లు సమాచారం.

ప్రసాద్‌రెడ్డి వ్యవహారం రాష్ట్రంలో అధికార మార్పు తర్వాత అత్యంత చర్చనీయాంశమైన విశ్వవిద్యాలయ పరిపాలనా అంశంగా మారింది. వైఎస్సార్‌సీపీ హయాంలో విశ్వవిద్యాలయ స్వయంప్రతిపత్తికి భంగం కలిగిందని, విద్యా సంస్థను రాజకీయ వేదికగా మార్చారని అధికార కూటమి ఆరోపిస్తుండగా, మరోవైపు ఈ చర్యలు రాజకీయ కక్షసాధింపులో భాగమేనని వైఎస్సార్‌సీపీ గతంలో ఆరోపించింది. ఇక విజిలెన్స్, ఏసీబీ విచారణల్లో వెలుగులోకి వచ్చే అంశాలపైనే ఈ కేసు భవిష్యత్ ఆధారపడి ఉంది.